Mar 16 | KKC | STEP | Osoloso Yu odoowo tei beeame olo daga dileso, hamamee Meli Magadalin, Yemesyo owee Meli, osoloso Salome, diayo melesenee medee tekepo sisigagili Yesuwo su mapoo hedilame moleeso misigaso.

Mark 16

Yesuye toloso hogabia goo

(Mat 28:1-8, Luka 24:1-12, Yon 20:1-10)

1 Osoloso Yu odoowo tei beeame olo daga dileso, hamamee Meli Magadalin, Yemesyo owee Meli, osoloso Salome, diayo melesenee medee tekepo sisigagili Yesuwo su mapoo hedilame moleeso misigaso. 2 Osoloso sadee toowa beeame gesikolodee osoko gie pounume, diba Yesuwo midoo agalame diadeeso. 3 Diba eli domopoo diadolone, diso dimapoo egeesee takaso, “Yo toowa wulu ou miyopoo kisi, odoo agayo bidige pigileisomo?” diso.

4 Esino diba dileso egeino, yo toowa wulu ou miyopoo kisi peegoo bidige puguloso molome egeiso. Yo toowa hagee dia toowa. 5 Eseme sobo diayo wulu ou ma kulodu galaga dileso egeino, odoo gie kauwa dugo sage heliye mouloso dee deedee dokolo badoboome egeiso. Eseme sobo diayo ogoloso, diba dia ebigaso.

6 Esino yayo dimapoo egeesee takaso, “Niba na ebi. A gooleedooso, niba Yesu Nasalet odoo homo bulubo magoo ma dokodoo yoguso eniga odoo ee esia molo. Esino yo hamapoo mauwe. Yo ta maga hogabiaso. Yo magoo mi mapoo niso ege. 7 Esiga niyo dileso, Yesu o hamamee dili Pita dimapoo takee, ‘Niba Gelili mapoo diadee. Bei Yesu yo daga malalo Gelili mapoo duso. Esiga niba dileso Gelili mapoo Yesu agalaiso. Bei Yesu yayo to hagee daga nimapoo takaso,’” diso.

8 Eseme diayo goo tiadoo sabolo obulone kikilikilone wulu ou maga hoguo diadeeso. Esino diayo eli domopaga diadolone, odoo hee mapoo to takele poogooso, bei diba obume.

Yesuye daga odoo abo mapoo dileso peledaba

(Mat 28:9-10, Yon 20:11-18)

[ 9 Yesuye sadee toowa gesikolodee mapoo ta maga hogabuloso, yo daga Meli Magadalin mapoo dileso peledabaso. Meli hagee Yesuye daga telega silone bo holo 7 o kulodu dobome yayo peegoo hasiso pugu sobo yoso. 10 Eseme Meli yayo Yesu ta maga hogabuloso sili ogoloso Yesuwo hamamee dili odoo diayo goohele sabolo pupusugulone debei mapoo dileso egeesee takaso, “Yesu ta maga hogabuloso silime, ayo egeiso,” diso. Esino diayo to hagee dume, o to mapoo tei tele poogooso.

12 Osoloso see hamamee Yesubolo sile sibili odoo bakadio Yoluselem abaga sibadaga molome, Yesu yo mudu opusomo doloso dimapoo peledabaso. 13 Eseme diayo Yesu ogoloso, diba see wedi dileso, Yesuwo hamamee dili odoo dimapoo diayo Yesu egei takeme, diayo dibada to mapoo tei tele poogooso.

Yesuye o hamamee dili odoo 11 dimapoo dileso peledaba

(Mat 28:16-20, Luka 24:36-49, Yon 20:19-23, Diye 1:6-8)

14 Osoloso hamamee, Yesuwo hamamee dili odoo 11 wo nalaga molome Yesu omapoo dileso peledabaso. Osoloso Yesuye to kitulugu sabolo egeesee takaso, “Niba tei too mauwe odoo! Bei kasimaga odoo abo oso a ogoloso, sibileso nimapoo takeme, dimapoo tei telega ka poogoowo?” diso.

15 Eseme Yesuye dimapoo egeesee takaso, “Niba mi toowa mapoo dileso, to tekepo odoo susuga mapoo takomo di. 16 Esiga odoo agayo to tekepo mapoo tei toloso howo sauwuga, yo badoboso, kookaiyo gie badeli talaiso. Esino odoo agayo to tekepo mapoo tei telega poogooga, yo goo palabalai beeame omapoo dou koo semili mapoo toodalaiso. 17 Osoloso edebeeyo to tekepo mapoo tei toga, diayo mo kitulugu sabolo goo mudu opusomo opusomodi moodoogamo sile sibileiso. Esiga odoo bo holo oso paladee mo hu maga peegoo hasisileiso. Osoloso diayo to mudu opusomo opusomodi kalagalaiso. 18 Osoloso dibada deeso sa talaiso, osoloso pei i nalagaga, diba wedileime. Osoloso odoo paigiga mapoo dibada deeso sigodaga, susuga weido dalaiso,” diso.

19 Osoloso Lodee Yesuye dimapoo to taka koodobuloso, Godeeyo kitulugu oso yo keimi mapoo ido peleso, Godeebolo wiligi doloso badalame, Godeeyo dee deedee dokolo peleso, biaso. 20 Eseme Yesu o hamamee dili odoo oso Yesuwo to ee mesilone, mi toowa mapoo to tekepo takomo diadeeso. Eseme diayo goo mudu opusomo opusomodi moodoogaso, bei Lodeeye dimapoo kitulugu teneme. Bei edebeeyo to tekepo mapoo tei doloso ogoloso gooleedalame.]